Kva kan Brann lære av Korona?

I heile verda set nasjonane i verk ei rekke tiltak for at R < 1 slik at Koronapandemien dør ut. Så lenge R < 1 smitter kvar person med Korona i snitt mindre ein annan og dermed vil pandemien gå mot slutten. I løpet av 2022 trur mange at Koronapandemien vil få langt mindre påverknad på liva våre. Då må vi erstatte Koronapandemien med ein Brannpandemi der målet er å få R > 1. Det vil seie at kvar Brannsupportar som kjøper partoutkort i snitt får meir enn ein annan supportar til å kjøpe partoutkort. Då vil Brannpandemien vare ei god stund og vi vil skape ein tribunedynamikk som det aldri før har vore på nivå to i Noreg. Men også for å få opp R krev det ei rekke tiltak.

a) Vi må vise heile verda at vi også i 2022 skal kjøpe partoutkort. Legg gjerne ut på sosiale medium at du skal kjøpe/ har kjøpt partoutkort.

b) Vi må markere Brann i byromma. Heng opp plakater og stickers over heile byen. Brann er Brann uansett nivå.

c) Kjenner du nokon som kanskje vil kjøpe partoutkort? Då kan du utfordre dei til å gjere det i 2022. Hugs at Obos med Brann er større enn Eliteserien utan Brann.

d) Er du frisk og frampå? Spel gjerne inn ein video med ei oppmoding om å kjøpe partoutkort.

e) Ha kontakt med flest mogleg for å smitte Brannkoket vidare. Unngå Brannkarantener og isolasjon. Planlegg bortekampar saman, møt opp på tifodugnad, lag fanzine, spel inn podcast og andre tiltak som få Brannpandemien til å vare lengst mogleg.

Får vi R > 1 vil Noreg møte ein kraftig Brannpandemi som vil rase gjennom landet. Til Raufoss, Stjørdal, Grorud og Bryne- ingen vaksiner hjelper mot denne pandemien.